باسـم المعتلـي جـلّ جلالـه
وصلى الله على محمـد وآلـه
لعـل الله يغفـر لـي ذنوبـي
أسال الله وغيـره مـا اسالـه
اسال اللي فتح بيبـان عفـوه
عقب ماتـاب عبـده والتجالـه
وعن شين الكلام اعـز نفسـي
واقود الفكـر لبيـوت الجزالـه
واسوي لـي بيـوتٍ منتقيهـا
اسويها علـى هيئـة رسالـه
انصيهـا بنـي هاجـر جميعـا
بني هاجر بلا استتثنـاء حالـه
ولابي شي منهـم غيـر ودي
اعد الطيـب واجـدد وصالـه
كريـمٍ فـي معانيهـا وكـنـي
بخيلٍ مـا يفـرّط فـي ريالـه
الى منـي كتبـت البيـت الاول
يجيني البيت الآخر في سهالـه
والا مني كتبتـه جـاء تبيعـه
وقامت تنطوي طـوي المحالـه
وانا لا من كتبت البيت اصونـه
ولا ناقد يجينـي مـن خلالـه
وقـدام الجماهـيـر الغفـيـره
على كل البيوت اعطـي كفالـه
عليها ختم إبن علـوش يعنـي
علامة جوده وفحـص الوكالـه
ثمنها قولـةٍ وش قلـت فيهـا
ولحـدٍ قـال قلهـا قلتهـالـه
سببها ماقريتـه فـي الجريـده
يقول ان الفخر سخف وخبالـه
تعمق في الصحافه جعله اتلـى
كتبلـه زاويــه والا مقـالـه
ضعيفٍ مادرى ان المدح كايـد
ولا حاشه يكون اللـي سعالـه
ابمدح ربعـي طـوال اليمانـي
واعـده كـل ماوافـق مجالـه
يابوك الهاجري لامـن مدحتـه
تجي فيـه انتفاضـه واحتفالـه
ولامنك مدحته وانـت صـادق
نطل بشتـه ولا خلـى اعقالـه
خلقنا الله لاهل الطيـب قـدوه
وكـل سنافـيٍ حنـا مثـالـه
بعضنـا لـو تغـدى ماتعشـى
ومستانس ومتنومـس ودالـه
يوضع **ـرة العـود الكبيـره
على المدخن الى زان اشتعالـه
يطيّبهم عقب جنـب السمينـه
والى من راح ضيفٍ جا بدالـه
يرص الدين فوق الديـن الاول
الين يسـد دينـه مـن حلالـه
مخاسيره خوافيهـا علـى الله
رصيده في المراجل راس مالـه
سلام الله علينـا يـا الهواجـر
سـلامٍ نستحـقّـه ونعنـالـه
فحنّا اللي نكـرّم مـن نصانـا
يمينه في الشحم عقب الفوالـه
وحنّـا اللـي صداقتنـا نقيّـه
بميـل الوقـت والا بعتـدالـه
وحنـا اللـي روابعنـا قويـه
ضعيف الرابعه نرفـى خمالـه
وحنا اللـي نقـدّر كـل حاكـم
لاعاهدنـاه نوفـي عهدنـالـه
وحـنـا هقاويـنـا كبـيـره
وحنا اللي تبين إبنـا الجمالـه
وحنـا اللـي نبيّـن فالشدايـد
الى من الزمـن شانـت ليالـه
وحنـا اللـي حميّانـا سريعـه
ومن حنا سنـاده طـاب فالـه
جمال حمول فـي كـل اللـوازم
حدانـا لابـرك للحمـل شالـه
مسمينـا موّحـد ذا الجزيـره
مليـكٍ مايشكـك فـي مقالـه
لسم * خزنة ظفر * والأسم منّه
وحنا كفـو لسمـه واحتمالـه
صدق عبد العزيـز الله يبيحـه
عسا الغفـران والجنّـه مآلـه
ولا علمٍ يجي من تحـت حيـده
لنـا فعـل وتواريـخ ودلالـه
لنا فـي جولـة الأيـام جولـه
زمانٍ فـات جعلـه فـي قبالـه
ولـو حنّـا شـويٍ ماعليـنـا
زهمنآ الجد الأول مـن جبالـه
يجي قحطان فـي لازم عبيـده
وترقى لـه عبيـده وتحمالـه
الي من ثـار دخـان الشنيعـه
معاديـنـا رقــاده ماهنـالـه
وناخذ صولةٍٍ فـي مـن نوينـا
وياخذ صولةٍٍ فـي مـن نوالـه
وتصبح عاصفة صحراّ صحيحه
كفانا الله مـن شـر الجهالـه
ولا نطغـى الـي منّـا قدرنـا
نخـاف الله والديـن إنحمالـه
وعقـب الله والديـن الكرامـه
تنزهنـا عـن دروب النذالـه
عطانا الله مـن مـدّه وجـوده
رقـابٍ ماحنيناهـا سـوا لـه
عوايدنـا القديمـه والجديـده
اصاله مستمـدّه مـن اصالـه
وكلٍ فيه مـن الأجـواد حقّـه
جنوبي نجـد وبنجـد وشمالـه
وقد حنـا بعصـرٍ فيـه نعمـه
عسى الشيطان يبطي في حباله
بفضـل الله ثـم سنّـة نبيّـه
وديـنٍ مادعـانـا للضـلالـه
وفي خير الخليـج الله يديمـه
نعيـمٍ كلّبونـا فـي ضـلالـه
ركون العز في الست العواصـم
سلالـه تنحـدر منهـا سلالـه
ولاودّي أطـول فـي مـقـالٍ
تكفينـا قصـاره عـن طوالـه
نهايتهـا ومضمـون ثمرتهـا
يـذم المـدح رجـلٍ ماينـالـه
وأقـول أن المراجـل ماتكمّـل
لا راح العـود ياتونـك عيالـه
سـلام الله علينـا يالهـواجـر
سـلامٍ نستحـقّـه ونعنـالـه
اهداء الى بني هاجر
وارجو الردود
